【Now財經台】上月發咗盈警嘅香港寬頻(01310)，昨晚(2日)派咗全年成績表，轉蝕逾12億元，不過，業績後股價今日(3日)一度爆升24%，係咪反映業績冇盈警咁差？市場關注集團嘅融資成本問題，滙豐證券指，集團已就大部分債務做咗對沖，去年經營資本亦由負轉正，投資者係咪可以放下息口對集團影響嘅戒心？
第一上海首席策略師葉尚志認為，香港寬頻最差嘅因素基本上已出晒，由於公司需要融資支撐發展，所以喺息口上升下，利息支出無可避免會增加。此外，疫情期間因WFH大增令寬頻需求特別大，導致出現高基數，但疫後需求明顯減少。
佢又話，雖然香港寬頻去年由盈轉虧，但蝕咗嘅12億元只係商譽，而整體表現都唔錯，加上股價創上市新低，投資者覺得抵買，繼而推升股價。
