【Now財經台】電力股近幾日跑出，其實唔同股份都有利好消息，火電股方面，華能國際電力(00902)主要就受惠於投資收益大增，同埋首3季業績扭虧為盈，大唐發電(00991)第3季亦賺返錢。風電股方面，雖然龍源電力(00916)收入少咗，但成本控制得好，呢幾份業績係咪都收貨？
英皇資本財富管理方案研究總監陳錦興指，大唐業績做得比較好，除咗收入有增長，受惠於電煤價格下跌，令盈利增長步伐加快。Stanley又話，雖然市場睇好火電股業績表現，但亦擔心內地經濟復甦不似預期，製造業又疲弱，擔心對發電業務有影響。
佢認為，由於火電及風電企業都面對價格壓力，導致電力股過去大半年持續受壓，直至最近出咗業績，股價開始企穩，甚至出現反彈，近期內地公布嘅經濟數據都好返啲，尤其製造業重返擴張水平，都會利好電力股前景。
