【Now財經台】渣打集團(02888)中午出咗季績，基本經營收入按年升逾6%，淨利息收入按年升逾18%，稅前基本溢利按年跌逾2%至13.1億美元，係今年最差嘅季度成績表，渣打股價午後跌幅顯著擴大，重挫逾10%，倫敦股價更一度急瀉17%。
耀才證券研究部總監植耀輝指，渣打上季表現差主要係商業撥備大增，加上淨息差按季收窄，至於淨利潤按年大減，主要受今年稅項支出增加拖累。
撥備方面，除信貸及其他減值外，集團上季再有一筆近7億美元嘅商譽減值，而所有減值項目都同渤海銀行(09668)有關，總數超過10億美元，較上半年大增3倍，Stanley估計，由於渤海銀行嘅情況仍未有改善，並預期會愈來愈差，所以渣打有機會要繼續撥備。
