【now.com財經】呢啲天氣真係舒服，過咗最熱嘅時間，但又未凍到痴肺，唔怪得之以前啲古人會Set九月初九去登高拜山，唔駛拜山嘅喺屋企亦都可以瞓到無日無之，幫自己叉足電。
今朝恒指都保持住受地心吸力嘅影響，開市跌118點，開報17,053點，作戰室未開市已經淡倉做好晒準備，極短線博17,000點呢層重貨牛全死幾乎係指定動作；16,800至16,899點嘅牛證如果今日都食得到嘅話，咁聽日就真係可以專心睇《施政報告》。
到正式開市之後，作戰室戰友搶過淡倉兼隨大市向下。依家9點45分，有戰友已經正數收工兼表示會用豐富嘅午餐犒賞自己；當然亦可能仲有一注半注淡倉旁身，以備之後忽然向下。
嚟到依家9點54分，望望我家貓肥睇完電視入咗房睡瞓之後，再睇返依家恒指，噢，連16,900點都無埋，最低見過16,894點，似乎大家一心諗住聽日可以專心睇《施政報告》。
至於喺呢一度，坦白講好多時開市之後出咗大方向，去到11點零鐘左右指數開始吽住橫行，以小時圖同今日指數&牛熊街貨擺計位，當然出淡倉向下殺牛係最正路之選。
「咁呢一Round又會落到去邊呀？」拉返大個日線圖，今年指數生成大型「下降通道」已經畫咗萬九幾次，由於成條大型「下降通道」斜度唔高，同埋喺通道裡面仍然有上有落咁Swing住向下，的確都係幾陰人有希望。不過都跌足10個月，京東(09618)主席劉強東開始日日被人問侯佢同佢母親大人之後，大家只會再搵嘅係下望目標，並100%相信F=GMm/r2 係可以應用於股市。
如是者，將恒指日線圖再縮少至去到上年底之後，戰友發現喺11月嘅時侯出現咗一個上升裂口仲未補，局部放大嗰一part再mark返啲數，裂口水平見16,138點至16,833點，係呀，我睇咗兩次應該無mark錯，呢個Gap位有成600幾近700點。以截至10點21分為止，恒指低位暫時做過16,879點計，同呢個裂口頂只係爭46點。
「咁直Put咪得囉」理論上係，街貨圖上都係，但指數依家喺日線圖上見「十字星」+踩住保歷加底線+Slow STC(14,3)兩線入到超賣範圍+指數同大型「下降通道」底線相差不遠，有可能觸發到指數喺大型「下降通道」裡面行Swing嘅情況，睇嚟逢高開淡嘅策略可以繼續。
恒指熊(56749)，收回價17,642點，為市場上第二貼價熊證，第一貼價嘅同佢都只係爭1點收回點數，但嗰堆啲街貨多過乜，仲有一隻100%添，你班友因住人踩人；避開高街貨之下pick(56749)，槓桿都有約24.89倍，同現價有逾710點距離，借五分鐘圖Slow STC(14,3)兩線上到超買位時出動，博日內出一趟Swing可以。
作者阿珊，以技術分析專心玩輪證，唔貪心，努力賺取我家肥貓罐罐。
作戰室免費試用，詳見專頁：https://bit.ly/3uixP4Y
