【now.com財經】噚日揀咗隻恒指熊(56410)出嚟，平均買入價為0.0525元，由於呢幾日市太靜，橫行到如同死魚一樣，所以先至膽粗粗提議呢注熊考慮過一過夜，試下食開市裂口嘅滋味；反正由10月12日起「十字星」+50天線阻力至今嘅「下降通道」裡面，已經出現咗兩個裂口，如果再多一個出現的話，三個裂口嘅印花已經集齊，「裂口理論」又可以拎出嚟多一次。
隔美多得鮑爺，我諗佢依家出嚟其求講句「Hello」，三美指都會向下搖落去。今朝起身見恒指ADR只係跌6點，持淡倉過夜嘅心諗：想你跌時你又唔跌，小喇叭。但到今朝9點20分時，許願成功，恒指開市跌168點，報17,127點。喺日線圖上見指數同10月4月 低位17,094點，兩者只係爭33點，雖然有少少高低腳，但你話佢接近「雙底」形態，並唔反對。
望望街貨圖，本身都以為指數喺開市後會向下篤穿17,100點少少，以便將17,100至17,199點全層重貨牛殺清，誰不知到開市之後指數即出低開高走，開市價即變成低位，既然係咁(56410)亦都無需要同佢講感情，沽貨走人。
如常的以10分鐘作為走貨時間，以9點30分至9點40分計，期內(56410)高低位做過0.07元/0.065元，平均走貨價為0.0675元，呢一注過夜平均賺15格或28.57%。
走貨後見指數低開高走，拉闊少少個日線圖，年初至今其實港股都係行緊一條大型「下降通道」，依家10點13分，指數跌幅有收窄過至高見19,242點，跌幅縮至跌53點，但裂口仍在嘅同時，留意指數亦開始接近呢條大型「下降通道」，配合埋「裂口理論」的話，指數的確有機會見反彈；重申，反彈並唔等於轉勢，佢仍然有權於大型「下降通道」中上上落落。
再望多次五分鐘圖，今朝開市到依家指數仍然受制於10線，但確實未見有明顯方向，同樣地單純以牛熊街貨圖擺位去睇的話，熊證出動買兇殺牛嘅機會率仍然偏高，不過今日如果要玩過夜注的話要小心，唔止過Weekend咁簡單，下周一(23日)為重陽節紅日，嚟到依家10點27分，連捉Day Trade嘅條件暫時都仲未見到，有咩留返拜完山先講啦。
作者阿珊，以技術分析專心玩輪證，唔貪心，努力賺取我家肥貓罐罐。
作戰室免費試用，詳見專頁：https://bit.ly/3uixP4Y
