【now.com財經】噚日睇過隻SPDR金ETF(02840)，揀埋隻S金Call(20439)出嚟，平均買入價為0.255元，純綷等返五分鐘圖Slow STC(14,3)抽返上超買之後就完咗件事。同時亦都預咗呢一注會係Hold得比較耐，2840嘛，唔會好似啲京東(09618)呀、美團(03690)呀咁樣，可以一下子倒水咁倒過去。
其實噚日下半場大約3點半打後，已經見到Slow STC(14,3)兩線上到超買至嚴重超買範圍，不過，2840嘅單位價格就無乜變大變動，由於本身一早講咗要預啲時間比佢嘅，所以膽大心細地過夜，今朝見美股跌300幾點，到恒指完U後跌192點，真心對個市都真係唔應該存在任何幻想，不過隻2840就逆市造好，今朝開市微升0.46%，報1,415元。再睇返五分鐘圖見2840嘅Slow STC(14,3)仍然保持住喺高位水平，最刺激嘅係Slow STC(14,3)%K線同%D線都見100頂到盡，呢啲位都真可以先走隻(20439)，如常的用10分鐘作為走勢時間的話，即係喺9點30分至9點40分開市後10分鐘內走隻(20439)，期內高低位做過0.26元/0.255元，平均走貨價為0.2575元，呢一趟其實都唔係執得好多，純綷只係輪價比較大，嚴格嚟講亦都只係打個和。
唔緊要，因為喺今朝未開市嘅時侯，見到指數咁樣向下低開，喺作戰室一早準備定淡倉，到依家10點15分，指數一度失守17,400點，同步見佢喺17,400點呢個位度唔再落，可能一口氣食咗1,217張期指街貨飽得滯，大家淡倉都趁機紛紛淡倉食餬，然後努力工作；係呀，開始習慣咗只係Trade開市之後嗰一個鐘，因為大家都知道就只有嗰一個鐘大市先至識得郁，其餘時間都只係等4點收市。
日線圖上見指數今日裂口向下，之前喺日線圖上畫出過有三個裂口嘅情況出現，符合咗「裂口理論」，之後指數於10月12日高位出「十字星」+50天線阻力再被推向下；到依家今日開市嘅裂口，反過來計其實已經係「下降通道」上嘅第二個裂口，如果/萬一再多一個的話，咁「裂口理論」又會出現，只不過今次出裂口時恒指嘅方向係向下，所以一旦「裂口理論」成形的話，或者會見返指數上行嘅可能。
再嚟到依家10點46分，五分鐘圖上見指數都係喺低位橫行，隨時進入保歷加通道收窄再等拓闊至得返60點高度然後又收市；反正依家指數靠近牛證街貨層，完全無方向之下，博指數下行殺近牛或者係唯一出路。
恒指熊(56410)，收回價17,894點，同現價有逾410點距離，槓桿有約39.73倍，呢個槓桿可以Day Trade，同時呢個收回距離過夜的話，注碼上小心啲就可以。如常的用五分鐘圖Slow STC(14,3)見超買落場就可以(如果佢上得到去的話)。
作者阿珊，以技術分析專心玩輪證，唔貪心，努力賺取我家肥貓罐罐。
作戰室免費試用，詳見專頁：https://bit.ly/3uixP4Y
