【now.com財經】噚日揀咗隻恒指熊(56323)出嚟，平均買入價為0.041元，朝早落場去到中午收市都見到隻(56323)為我帶來一盒兩餸飯，而噚日嘅【輪證下半Part】亦都講咗話以Swing Trade方式去處理埋隻(56323)。而喺噚日下半場開市後，指數於五分鐘圖上嘅保歷加中軸的確係扭擰咗一段時間先至再落，講緊喺下晝1點25分左右，確認得到指數下行。及至1點35分，Slow STC(14,3)兩線已經到返超賣水平，(56323)可以「行使」變三餸飯。
按1點35分起計，如常的以10分鐘作為走貨時間的話，即以1點35分至1點45分，(56323)期內高低位做過0.047元/0.044元計，平均走貨價為0.0455元，呢一趟平均賺幅為4.5格或10.98%。唔呃你，呢一注係今個月第二注有雙位數嘅正數紀錄，可想而知今個10月同乞食無乜分別。
今朝起身睇電視見到隔晚美股升10幾點完場，可能係因為以巴戰爭最近玩到炸醫院，令本來以為可以靜一靜嘅局面再次激起，債市孳息抽到上天花板，都唔怪得今日恒指低開。
不過，指數低開後，依家10點55分已見佢高走返見倒升，五分鐘圖上見今朝開市下行，作戰室淡倉喺未開市前已經準備好，到開市後大家衝出去搶完貨再爬完格仔見正數，有啲就係噚晚帶貨過嚟見位走嘅，Anyway，正數就好了。
講起打仗，逢係呢啲時侯金價受到避險因素影響，通常個價都會上到天花板，印象中早幾日仲喺FB見到有張相影到金行門口有人排隊？哈哈，我無FC過係排隊做乜，但又真係未至於要排隊買實金嘅，SPDR金ETF(02840)簡單好多，亦都有Call/Put可選。
日線圖上見今日單位價格上到100天以上水平，出上影線又真係唔多OK，不過換上保歷加通道的話，見單位價格到依家都仲未掂到保歷加頂線，Slow STC(14,3)兩線已經處於超買範圍，有似準備行超買再超買咁款。
目前市場上有26隻S金Call，真係好多選擇，如S金Call(20439)，行使價1,499.5元，同現價有約6.61%價外，出年年底先至到期，約6倍引伸就可能要放得耐少少時間。依家11點1分，見(02840)嘅五分鐘圖Slow STC(14,3)落返去超賣，機會嚟啦！
作者阿珊，以技術分析專心玩輪證，唔貪心，努力賺取我家肥貓罐罐。
作戰室免費試用，詳見專頁：https://bit.ly/3uixP4Y
