【Now財經台】截至早上11時止，1小時內《彭博》用戶關注度上升最多首5隻港股，依次為中國銀行(03988)、騰訊控股(00700)、友邦保險(01299)、信達生物(01801)、新世界發展(00017)。
內銀將於下周起陸續派第3季成績表，高盛最新報告指，早前公布嘅9月社會融資數據勝預期，反映零售個人貸款有復甦跡象，並預期呢個趨勢將會喺內銀第3季業績反映，抵銷按揭及信用卡貸款疲弱影響。
富昌證券聯席董事譚朗蔚表示，相比近月嘅金融數據，上周中央匯金加注四大行A股，更能即時提振內銀股股價，並指工商銀行(01398)、農業銀行(01288)已出現見底訊號。
Stevan續指，「國家隊」講明未來半年會繼續增持，認為只要宏觀經濟、內房融資、自身業績等情況冇明顯惡化，中行股價亦有見底可能，有望挑戰3元水平，佢又話，想長揸收息嘅投資者，依家可以開始買第1注。
