【Now財經台】海信家電(00921)昨晚(11日)發盈喜 ，預期首3季多賺最多1.3倍，單計第3季則多賺最多1.1倍至9.68億人仔，主要受惠於公司持續深化變革，令規模、利潤、資金等經營質量提升，刺激海信股價今日炒高12%，但值得留意係，對比中期賺14.9億人仔，第3季似乎有所放緩。
艾德金融聯席董事陳政深指，第3季增長的確放緩，但其實係正常，因為製造業喺第3季一般比較淡靜，只要數據唔係太差，都唔會視為負面因素。佢又話，海信主要做白色家電，例如冷氣機等，由於內房進入冰河時期，導致內地業績難有增長，唯有依賴出口業務，面對內地出口數據普遍下跌，海信半年出口數據仍錄得增長，因此，市場對公司有正面反應。
Ryan又指，海信中期業績顯示，海外自有品牌收入增長42%，有利未來銷售，長遠而言，可提升競爭力及毛利率。
股價方面，陳政深認為，依家追入海信仲有值博率，雖然未擺脫弱勢，但已企穩咗18元，要破21.9元阻力唔難，上望空間約10%。
