【Now財經台】截至早上11時止，1小時內《彭博》用戶關注度上升最多港股，依次為舜宇光學科技(02382)、騰訊控股(00700)、小米集團(01810)、友邦保險(01299)及比亞迪股份(01211)。
手機股小米今日上榜，有新消息之餘，升勢亦有成交配合，不過，消息同造車有關，據《彭博》報道，小米及華晨中國(01114)、奇瑞汽車就潛在汽車生產合作展開磋商，之前都傳過小米同北京汽車集團磋商合作，其實呢啲都係傳統車廠，加上董事長雷軍年初曾經講過，預期小米汽車明年量產，係咪依家可以炒定先？對股價有咩影響？
椽盛資本投資總監曾永堅指，小米發展新能源汽車勢在必行，管理層亦想加快發展步伐，依家最欠缺係可以量化生產嘅廠商配合，所以就傳出同傳統車廠傾合作嘅消息。
佢又相信，短期而言，消息會對小米股價有正面影響，近期小米股價處於下跌橫行區，續於11.3至12.9元上落，能唔能夠突破12.9至13元嘅阻力，就要睇新能源汽車業務有冇突破性發展。
