【now.com財經】小犬走咗之後，呢兩日天氣都開始有啲清涼嘅感覺，終於都Feel到真係嘅秋天到啦，不過今朝起身睇新聞時，天氣小姐話今日最高都有29度...個地球係咪會熱到有一刻會爆炸架？
恒指噚日高開高走過後，喺下半場全日低走，最終收市將升幅縮窄返去升147點，報17,664點，喺牛熊證街貨擺位上再次放喺牛熊之間，然而，以兩邊街貨嚟秤的話似乎牛證第一層17,300至17,399點有過千張期指係比較吸引。
不過，恒指呢兩日開市都見有反地心吸引嘅走勢，今朝開市彈升逾200點，靠近返熊證街貨層。及至依家9點59分，指數一度升逾300點，高見18,012點，將第一層熊證17,900至17,999點嗰325張期指街貨全數收回，留意返今日都預咗佢會打18,000點攻防戰，淡倉進駐於18,100至18,199點嘅熊證街貨，雖然嗰層未見過千張期指，但以805張期指街貨儲成重貨區。
再到10點，指數上過18,000點之後暫時未見企穩，五分鐘圖上亦見保歷加通道底線有開始上行走勢，換言之Slow STC(14,3)同指數開始有條件出Swing Trade玩法。但唔好忘記噚日指數裂口一上，上破20線之餘仲上破埋9月初開始築起嘅「下降通道」，假如今日收市企得到喺18,000點樓上的話，呢條「下降通道」都幾可確認係破位，而拉闊少少個日線圖就會見到下一關到50天線或今年初Q1尾開始畫得出嘅「下降通道」頂線。
都係唔好拉得太遠，港股力度有幾勁大家心裡有數。依家10點8分，五分鐘圖上見指數生出「小圓頂」物體，底線借住噚日高位17,916點拉過嚟，暫時未見破線，同步10線亦抽高中。換個小時圖則見今日第一粒出咗高位「十字星」，下方仍然有150線可以接住，10線亦保持上行形態。如果今日指數同噚日一樣都係抽高嚟跌的話，咁就有可以呢粒高位「十字星」比力壓低指數向150線或10線水平。都係嘅，小時圖條「上升通道」今朝一開到頂，慢慢向下回落10線都只係「上升通道」底線。
比多次個五分鐘圖，見指數依家到10點13分時剛好踩返住10線，喺過與唔過之間好似要徘徊一陣。過線嘅，恒指熊(54381)，收回價18,350點，同現價有約270點距離，槓桿約44.94倍夠博今日指數於小時圖上回返落去10/150線；但如果有支持，指數要再上的話，18,000點水平仍然都係關鍵，以依家10點16分恒指報17,930點計，約70點水位，咁唯有出動市場上最高槓桿嘅恒指牛(55937)，收回價17,526點，今日新上市所以未見有街貨，同現價有約450點距離已經係市場上最貼價嘅牛證。
雖然炒輪證嘅有好淡兩邊可以做，但如果港股可以企得返上18,000點，係今年第四季做返好少少嘅話，換個氣氛，咁炒邊一邊都可以輕鬆啲啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，努力賺取我家肥貓罐罐。
作戰室免費試用，詳見專頁：https://bit.ly/3uixP4Y
