【Now財經台】中遠海控(01919)及東方海外國際(00316)分別發咗盈警及出咗最新營運數據，股價今日齊齊向下，中遠海控預期首3季純利按年大跌77%，東方海外第3季收入按年跌65%，跌幅都十分顯著，係咪反映第3季表現差過上半年？
英皇資本財富管理方案研究總監陳錦興指，中遠海控上半年盈利大跌約70%，單睇第3季亦有相應跌幅，東方海外第3季收入跌幅大，但其實上半年已經表現疲弱，反映第3季冇明顯改善之餘，仲進一步轉差，主要係運價持續受壓，今年營運表現未達到市場預期，令股價有明顯跌幅。
至於航運股係咪唔好沾手，還是個別可以受惠到波羅的海乾散貨指數上升，陳錦興就話，都有航運股可以受惠，例如太平洋航運(02343) 走勢係同主要從事集裝箱業務嘅航運股唔同，因為公司主要做乾散貨運輸，如果波羅的海指數持續上升，會推升公司收入及盈利，若內地經濟好轉，太航受惠程度會更大，所以值得部署。
