【Now財經台】以色列跟與巴勒斯坦武裝組織哈馬斯，喺剛過去嘅周末突爆發戰事，刺激原本連日捱沽嘅油價喺今日(9日)亞洲交易時段一度大升5%，帶挈「三桶油」股價顯著造好，其中，上游油企中國石油股份(00857)、中國海洋石油(00883)收市升逾2%，中國石油化工(00386)亦升1%。
「三桶油」上月剛除淨，下次派息要到明年中，係咪值得依家部署石油石化股？博威環球證券金融首席分析師聶振邦認為，中長線而言，現時3隻油股股息率有7厘以上，屬於吸引水平。佢又引用高盛喺「三桶油」業績後嘅報告，指該行認為中石油及中海油可睇高一線，相應上調目標價，並給予「買入」評級。
雖然中石化股息率達9厘，但聶Sir指，集團下游業務佔比較大，反而受制油價成本上升，若油價升勢持續，相信中石化股價將面臨更大沽壓，建議投資者宜忍忍手，先觀望一下。
