【now.com財經】由於呢幾日個市都好似只係郁開市後嗰半小時，跟住橫行等收工，噚日成交仲要縮到得返600億都唔夠，真係留名等睇一日成交等於以前半日市成交。喺【輪證下半Part】揀咗隻恒指Put(12586)出嚟，計劃喺尾市時段如果先到五分鐘圖嘅Slow STC(14,3)上到超買兼出現觸頂的話，可以小注落場。
基於呢一注好明顯係過夜注，所以注碼上應該同平時Day Trade有分別，幾多無規定，但至少過夜後可以確保自己仍然可以安枕無憂。
睇返恒指五分鐘圖，指數同Slow STC(14,3)喺下午2點半開始完成超賣兼出觸底回升至3點時，已經見到Slow STC(14,3)嘅%K線上返去90以上嘅嚴重超買水平，但呢個鐘數未係適合出手落過夜注，因為都只係3點啫。如果用返平時10分鐘作為落場買貨時間的話，咁3點50分時可以再睇返條Slow STC(14,3)。
終於等到3點50分，Slow STC(14,3)兩線已經貼住喺天花板行咗一段時間，(12586)亦都符合咗出貨條件，依家爭嘅係勇氣同膽量，膽量注細下出(12586)，以最後10分鐘作為落場時間的話，期內(12586)做過0.179元。
天文台喺噚晚已經發出咗1號戒備訊號，今日呢個訊號仲應該會Keep全日。睇番前日打完颱風嘅美股，噚日都回返少少，及至今日港股都見返綠色，截至依家9點52分，恒指做緊17,231點，升35點。
指數見綠當然不利隻(12586)啦，望望輪價依家做緊0.174元，五格還可以頂住，事關比較在乎嘅係依家五分鐘圖上見指數高開高走過後，被150線壓住向下但亦見下方有10/100線雙線接住，按整條保歷加通道目前仍然呈上中，(12586)亦應該畫定逃生路線；不過，嚟到依家差不多10點，其實都未見恒指有一個明確嘅方向出嚟，所以作戰室未敢開出第一注，寧願唔郁都唔要被佢「左一巴，右一巴」。
喺五分鐘圖漸漸見到「三角形」成形，一旦向上作出突破，(12586)當然先走為上；但如果佢Keep住來來回回的話，就比啲時間佢啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，努力賺取我家肥貓罐罐。
作戰室免費試用，詳見專頁：https://bit.ly/3uixP4Y
