【Now財經台】港股踏入第4季出師不利，昨日(3日)喺10月首個交易日一度瀉近600點，開局表現都幾嚇人，延續第3季環球股市齊跌情況，其中，債息扯高繼續困擾市場，美國10年及30年期債息齊衝上16年高位，點解債息近期抽升得咁急？
恒生投資董事兼投資總監薛永輝指，主要係美國通脹回落速度比預期慢，而市場之前對通脹回落睇得太樂觀，其中，核心通脹只會慢慢回落，因為其中一個關鍵因素係工資，短期睇唔到會大幅回落，因此，令市場預期落空，導致債息扯高。
至於美國加息周期係咪快將結束，要幾耐先睇到經濟有放緩跡象？Wilfred就話，近期加息嘅速度減慢，佢估計，聯儲局可能加多1至2次息，如果之後嘅經濟數據反映經濟出現轉弱訊號，聯儲局就會停止加息。
薛永輝續指，睇返聯儲局過往嘅加息數據，每次加息超過5厘，之後經濟就會陷入衰退，而由加息到陷入衰退平均約20個月，如果參考返呢個數據，估計美國經濟大約喺2024年上半年出現衰退跡象。
