【Now財經台】總結9月，表現最好嘅藍籌分別係中國神華(01088)、招商銀行(03968)、建設銀行(00939)、滙豐控股(00005)、工商銀行(01398)，其中，神華股價9月累升逾10%，跑贏一眾金融股，而其他煤炭股同業今個月表現亦特別亮眼，兗礦能源(01171)累升20%，中煤能源(01898)亦累升約15%，究竟炒緊咩因素？
註冊財務策劃師協會會長黃敏碩表示，最近內地加強煤炭生產安全監管，部分煤企被下令停產整頓，令煤炭供應有所減少，又指煤價持續上升，以秦皇島5500大卡動力煤而為例，而家挑戰緊每噸1000人仔水平，預料有機會去返接近1100人仔水平。
Michael續指，內地就到供暖季節，唔少公司可能趁而家追加產量，相信上述利好因素會反映喺第3季業績，尤其利好主營上游業務嘅煤企。
Michael認為，雖然兗礦等同業今個月升得勁過神華，但就基本面而言，神華業務表現比較四平八穩，除咗煤礦產量穩定，又有「煤、電、港路」四大業務支持集團自給自足，有助穩定毛利率同營運效率，又話股份預測市盈率(PE)約7倍，估值吸引。
