【Now財經台】截至早上11點，1小時內彭博用戶關注度上升最多的環球股份，依次為Nike、滙豐控股(00005)、阿里巴巴(01688)、騰訊控股(00700)、新世界發展(00017)。
噚晚Nike出咗業績，收入遜預期，但盈利勝預期，又話去庫存進度理想，庫存按年減少逾10%，亦提到中國市場收入升幅比預期少，但喺當地市佔率仍有增長。大華繼顯執行董事梁偉源指，雖然Nike為去庫存要減價促銷，但業績顯示毛利率有上升，反映減價壓力並唔大。
Nike公布業績後，今朝港股嘅體育用品股造好，呢份業績對內地體育用品股有咩啟示？Steven就話，雖然Nike市佔率變高，但唔代表內地同業輸咗，並指內地體品品牌去庫存步伐比Nike快，投資者見Nike去庫存都可以去得咁好，可能因此憧憬李寧(02331)同安踏體育(02020)嘅去庫存周期就到尾聲。
