【Now財經台】達美樂比薩(Domino Pizza)內地及港澳總特許經營商達勢股份(01405)股價逆市破頂，創74.85元嘅上市新高，較招股價46元高逾62%。
集團今日剛好上市半年，意味大股東「解禁」可以沽貨，開市前咁啱錄得1宗大手交叉盤(X盤)，涉及524.8萬股，每股作價59元，涉資3.09億元。X盤指非自動對盤、買賣雙方皆為同一經紀行嘅成交，坊間亦有說法，指X盤意味「左手交右手」，目的可能係托價。
耀才證券研究部總監植耀輝指，呢宗大手成交佔總發行股數4%，加上達勢兩大股東，即副董事長James Marshall以及Domino Pizza母公司持有逾4%股權。
Stanley續指，假設該X盤同佢哋有關，值得留意稍後喺中央結算系統(CCASS)嘅股權披露，係邊位沽貨、邊位接貨，定係另有其人。如果由「大孖沙」接貨，對公司未必係壞消息。
