【Now財經台】澳門今年首8個月賭收1140億澳門元，雖然按年大升近3倍，但對比2019年同期約1982億澳門元，仍有一段距離。明日(29日)至10月6日係一連8日嘅超級黃金周，有冇機會幫到全年賭收，追及疫情前水平？
喺澳門半島經營十六浦項目嘅實德環球(00487)副主席馬浩文認為，今年全年賭收要超過2019年相對困難，因為已經少咗大半來自貴賓廳(VIP)嘅收入，而目前中場賭收增長仲未追得上當年水平。
不過，Hoffman表示，新博彩法實施後高端客增長比預期快，市場原本預期貴賓廳收入僅能回復至疫情前10%至20%，而業內最新數據顯示已復甦近30%。
Hoffman續指，唔少同業以往主要做貴賓廳，所以整體賭收復甦較慢，但其實貴賓廳業務嘅純利率好低，而家更要靠中場拉動盈利增長。
佢話，旗下賭場自2019年起只經營中場，賭收已經回復到疫情前約85%，並估計只要中場收入增長10%至20%，就能帶動集團純利超過2019年水平。
