【Now財經台】資金再度炒作減肥藥概念股，其中，聯邦制藥(03933)噚晚出通告，指附屬公司自主研發、用嚟控制第2型糖尿病、超重肥胖嘅創新藥「UBT251注射液」，獲美國食品藥物管理局(FDA)批准新藥臨床試驗申請(IND)。
聯邦股價今日最多升逾9%，高見8.06元，升穿上周一(19日)大股東配股減持前刷新嘅高位，即8.03元，股價已連升第4日，加上技術上已補返上周二(20日)形成嘅下跌裂口，亦收復咗配股價7.33元。
南華金融集團高級分析師莫灝楠表示，聯邦以往主要生產技術含量較低嘅胰島素藥品，依家有新產品線，相信目前市盈率(PE)僅約8倍嘅公司，有機會炒到10倍以上。
不過，Casper指，如果美股嘅減肥藥概念股，包括兩大龍頭禮來、丹麥藥廠諾和諾德開始見頂，要小心港股呢邊嘅影子股受影響，而聯邦制藥嘅股價已經衝得幾高，不過佢預料短線喺20天線，即7.2元附近會有較大支持。
