【Now財經台】魯大師(03601)近日被質疑「割韭菜」，即利用消息炒高股價，然後大股東散貨。魯大師喺9月11日發通告，指會召開董事會考慮派特別息後，股價炒高50%，及至9月20日喺未有傳出重大利淡消息下，股價突然大跌，集團喺9月21日開市前公布，原來有控股股東出售部分持股，其後又宣布取消向股東宣派特別息建議嘅董事會會議，唔少人認為集團當投資者係「韭菜」，會唔會真係一個有目的嘅操作？
《香港股票財技密碼》作者梁杰文認為，呢個情況都好難唔令人懷疑，其中，最特別係9月11日發出嘅召開董事會通告，因為集團一早已出咗半年業績，如果要宣布派特別息可以同步公布，依家就拉升咗原本業績後冇乜水花嘅股價。
Mike就話，魯大師市值之前大約3億元，財政狀況健康，負債好低，但現金非常多，有約5億元，所以近幾年都有唔少投資者留意佢，憧憬公司會派息，消息一出，吸引唔少投資者蜂擁入場，托高咗股價，並相信有唔少投資者高追，但最後嘅結果就好令人意外。
