【Now財經台】據美國聯儲局內部預測顯示，今年有機會再加息0.25厘，明年就可能減息0.5厘，主席鮑威爾喺會後暗示年內或會再加息。摩根大通行政總裁戴蒙估計，聯儲局未來幾個月可能要再加息遏通脹。據最新利率期貨顯示，12月加息機會只係50%，美匯指數見半年高位，後市會點走？
亨達集團助理總經理羅明立認為，依家環球央行都係見步行步，利率政策唔會講到好死，如果通脹唔係來勢洶洶，經濟又下滑，唔排除貨幣政策可以鬆動啲。不過，美國經濟基本面暫時仍然唔錯，再加息嘅機會仍然較高。至於美匯指數後市有機會上望106，但升唔升得穿呢個位仲要睇睇。
