【Now財經台】有基金嘅主要持股已剔走有外資持股嘅中資科網股，另有基金經理建議投資者盡量避開外資持股較多嘅中資科網股，因為中美脫鈎係大勢所趨。據《彭博》終端機數據顯示，騰訊控股(00700)、阿里巴巴(09988)、美團(03690)、京東集團(09618)及網易(09999)等主要股東都有外資，睇返今年股價表現，除咗網易累升逾30%，係暫時表現第4好嘅藍籌外，ATMJ股價都錄得雙位數跌幅，當中有咩啓示？
艾德金融聯席董事陳政深認為，基金經理嘅睇法絕對合理，因為都有數據支持，值得留意係，ATMJ已失守短期支持位，其中，京東創新低，騰訊退守300元關口，雖然網易走勢相對好，但近期走勢都唔好，股價由160元跌到150元水平，反映唔少資金走得幾急。
Ryan又指，由於ATMJ都入咗超賣區，相信會有資金撈底，但另一方面外資又走緊貨，喺呢個情況下，外資持股較多嘅股份一定跌得比較急，而同板塊嘅個股都好難獨善其身，分別在於跌先還是跌後，同埋跌多跌少。
