【Now財經台】百濟神州(06160)宣布唔再授權瑞士諾華(Novartis)，喺海外開發、生產及商業化旗下用於治療多種癌症嘅藥物「百澤安」。百濟股價今日最多跌近6%，低見119.4元。
元宇證券投資總監林嘉麒指，兩年前雙方達成嘅授權協議交易總額22億美元，認為百濟股價急挫，或反映市場覺得公司見財化水，以及憂慮「百澤安」未來商業化時需要更多成本，唔似以前齋袋諾華嘅錢咁袋袋平安。
值得留意係，諾華早於7月已被百濟終止另一項在研藥物嘅海外許可權，近年亦偶有內地藥廠同海外藥企拆夥嘅消息。
KK就話，受中美關係緊張影響，內地藥廠嘅產品較難通過美國食物藥物管理局(FDA)審批，或使美國藥廠逼於無奈，只能轉去同其他國家嘅藥企合作，相信取消跨國合作已成常態，未來醫藥板塊會傳出更多拆夥消息。
