【Now財經台】貓眼娛樂(01896)股價今日強勢，一度升近7%，逼近12元關口，衝上逾兩年高位。摩根士丹利發報告唱好行業及相關個股，預期今年中國電影票房可回復至疫情前90%水平，加上國產片質素大幅提升，成爲票房增長動力，並指貓眼係其中一個受惠者。不過，大摩估計，貓眼下半年盈利同上半年差唔多，係咪意味集團受惠程度其實有限？
寶鉅證券董事及首席投資總監黃敏碩認為，國產片係咪可以維持高質素，持續吸引觀眾入場仍存在不確定性，貓眼股價能突圍而出，主要係集團發行及出品上半年業績唔錯，參與發行出品嘅國產電影，覆蓋同期總票房逾80%，但下半年嘅盈利要睇公司發行嘅電影可唔可以跑出或大賣。另一項穩定業務係票務平台，只要票房較高，貓眼都可以受惠，加上現時經濟環境較差，消費模式改變咗，市民多咗去睇戲，票務平台可以食正消費新動力嘅紅利。
Michael續指，貓眼嘅票務平台亦涵蓋演唱會等，內地疫後參與實體活動嘅情緒比較高漲，由於演唱會等活動都唔少，幫到票務及廣告收入，令貓眼本身嘅一條龍服務相得益彰。
