【Now財經台】光伏股新特能源(01799)「回A」計劃有新進展，上交所將於下周二(19日)審議集團回A事項，新特股價今日最多升17%，高見16.28元，衝上逾1個月高位，收市仍逆市升逾15%。
新特能源主力生產太陽能級多晶硅，屬光伏行業嘅上游業務，集團計劃回A籌最多88億人仔，並將所得用來發展高端電子級多晶硅項目，集團預期，年底前實現達質達產，並指集團嘅多晶硅產量及質量將進一步上升。
南華金融集團高級分析師莫灝楠認為，新產品對提升盈利能力有幫助，但硅料行業已過咗前兩年嘅高周期，多晶硅價格由當時高位每噸30萬人仔，大幅回落至依家約8萬人仔，接近成本價水平。佢又話，多晶硅價格再下跌嘅空間有限，但預期行業明年仍處於低潮期，新特毛利率將進一步下跌。
Casper續指，新特股價今日只係借回A新消息炒上去，並要注意一旦集團喺A股正式上市，H股股價好易回落。
