【Now財經台】新晉人蔘股寶沙發展(01069)停牌近1個月，今日復牌暴瀉，一度重挫近80%，低見0.29元。公司上周四(7日)公布，計劃以766萬港元收購一家做西洋蔘產品嘅內地公司52%權益。
寶沙自7月底達成債務計劃後曾經復牌，股價喺兩周內一路炒上2.25元嘅高位，但之後急挫兼停牌。
《香港股票財技密碼》作者梁杰文指，寶沙股價今日進一步插水，更變返毫子股，估計未來幾個月股價會喺現水平浮浮沉沉，因為公司啱啱轉型，要等業績出咗嚟，睇下人參相關業務嘅盈利及派息能力後，先衡量到公司中長線投資前景。
Mike續指，雖然寶沙概念獨特，目前港股冇其他公司做人蔘種植同銷售相關業務，但值得留意係，即使做實地考察，仍好難調查清楚業務嘅真確性。事實上，過去唔少喺本港上市嘅農業股因為涉及造數，加上業績錄得巨額虧損而要停牌，甚至被除牌。
