【Now財經台】本地龍頭銀行滙豐銀行喺聯儲局下周議息前，突然追加樓按息，打撃投資者情緒，就連房託都難逃一跌，早前已失守供股價嘅領展房產基金(00823)，股價今日都要受壓。全球利率進入「高原期」，高息環境持續，買樓收租及投資房託嘅吸引力，係咪持續低迷？
香港大學房地產及建設系客席副教授楊書健指，10年前利息減到零，同依家「高原期」當然有分別，對投資者嚟講，買短期債券或造定存都收到4厘至5厘息，相對之下，買樓收租嘅吸引力就大減。
佢又話，所謂「高原期」，係市場預期未來6個月、9個月、12個月，利率就會跌返落嚟，原因可能係經濟衰退或通脹受控，依家買房託及高息股嘅好處，理論上係預期遲啲會升返上去，不過，當息口下跌時，買短期債券或造定存就未必收到4厘至5厘息。
