【Now財經台】白酒股珍酒李渡(06979)今日獲納入港股通，隨即就獲北水寵幸，股價喺大成交下一度急升逾15%，高見10.88元，創4月上市以來新高，收市仍逆市升逾12%。
早前，高盛報告指，集團預期，今後3年經調整純利增長30%，毛利率最高達65%，淨利率則達30%，並於績後繼續唱好珍酒李渡，重申「買入」評級及14.4元目標價。
華盛證券經紀部董事李偉傑認為，管理層指引中嘅利潤率目標高過中期業績，而9月底至10月初係白酒行業銷售旺季，反映集團對第3季以後嘅銷售表現樂觀。
Jason續指，其實市場上月起已炒緊珍酒李渡入港股通嘅憧憬，估計短線會有北水撐場，股價可望持續強勢。不過，佢提醒，珍酒李渡嘅半年禁售期將於10月27日屆滿，到時要小心大股東喺「解禁」後沽貨，繼而推冧股價。
李偉傑又認為，如果部署半年至1年嘅中長線投資，經滬港通買龍頭貴州茅台亦可以考慮，近月股價向好，已自低位逐步反彈。
