【Now財經台】內地房地產仲介貝殼(02423)中期轉賺逾40億人仔,單計第2季,經調整淨利潤亦好過預期,賺逾23億人仔。貝殼績後受捧,今日一度飆22% 高見49.7元,收市仍升逾19%,報48.55元。
博威環球證券金融首席分析師聶振邦認為,貝殼除咗盈利表現唔錯,呢份業績最大亮點係首次派息,派特別息5.7美仙,折合約0.45港元,雖然金額唔算多,但集團今次攞咗逾2億美元派息,係以行動證明現金流穩健,相信唔少資金因而追入股份。
管理層又話,未來會繼續回購,並擴大規模至20億美元,聶Sir指,貝殼今年累計回購約27次,反映公司積極支持股價,會利好後市走勢。
內地頻頻出招撐樓市,據內媒報道,近期睇樓量上升,聶Sir指,如果睇好內地二手樓需求,可以中長線關注貝殼,並指現價距離年初高位55.8元,仲有一定上升空間,若以市帳率(PB)計,貝殼現時PB只得2.2倍,據歷史數據顯示,貝殼合理PB約3倍,意味股價最少有逾20%水位。