【Now財經台】由中國恒大(03333)到碧桂園(02007)，雖然近期傳出好多打救內房嘅政策，除之前減政策利率，最新有「認房不認貸」、減按息，甚至人民銀行可能降準，但似乎都係針對救樓市，唔係救企業，內房係咪要自救？例如碧桂園最新向債主建滔集團(00148)折讓配股還債。
廣東省地產商會副會長尹德輝指，企業係自行運作，政府對呢方面唔會在意，但賣樓會影響民生，佢認為，個別內房欠債咁多中央唔可能救到，上市公司借錢一般同銀行借，或同基金合作，會睇返股票價值，再計返適當比例，透過配股或抵押借錢畀呢啲公司，不過，前幾年發嘅特別外國債，唔係睇公司資產，而係睇信譽，如果認為某個項目值50億元，就借50億元，所以如果一間公司正正經經去借錢係唔會出事。
