【now.com財經】噚日用進取方式喺朝早將隻恒指熊(52285)送落場，平均買入價為0.0435元。同時喺【輪證下半Part】都Set好咗以五分鐘圖嘅保歷加中軸作為量度線，過線即走。
一踩入下半場，恒指真係慢過豬油，還好方向都總算正確，下半場一開市之後指數向下再落，將升幅縮細於300點以內。確實是打咸露打到不知何年何月，慢活下指數喺2點50分忽忽企高於中軸以上水平，係觸發咗(52285)嘅走貨訊號，但其實指數喺中軸以上企多過10分鐘都無，指數喺3點鐘見再次低於中軸以下水平，仲一直至收市為止。如果大家出咗淡倉同樣地用中軸作為量度線的話，持貨至完場前10分鐘走貨唔過夜應該Fat fat嘅，不過確實是有講過一過中軸就閃淡倉，所以用2點50分計數啦。
以2點50分起計見到指數重上五分鐘圖中軸以上水平走(52282)，如常用10分鐘作為走貨時間的話，期內(52285)高低位做過0.053元/0.05元，即平均走貨價為0.0515元，呢一趟平均有八格或18.39%賺幅。
果然，市底弱賬面出咩招數都係無用，最後指數行足一日高開低走，收市升幅縮窄至升174點，報18,130點；或者比較重要嘅係指數可以重上返18,000點以上水平先啦。
今朝起身見隔晚美股造好，而ADR普遍都見有升，恒指今朝早亦都繼續造好，開市報130點，升18,261點。本身呢啲咁樣嘅開市走勢，喺作戰室會計劃第一注比隻好倉出去追升，不過經過噚日嘅全程低走之後，今朝都真係等咗一陣，見指數喺高位企定同搵到方向之後先至再出手。
雖然係遲咗少少，喺開咗市大約10分鐘之後先至出手，但嚟到依家9點47分，指數確認上行兼升幅再擴大至升220點，報18,351點，方向正確就無問題啦；反正第一注向來都係爬格仔。
換個小時圖見指數大約8月20幾號開始至今，慢慢將整個形態扭轉，目前見整條保歷加通道上行中，只係保歷加通道口有見收窄，不論上定落都有限制住。等到10點，小時圖上再生多粒燭，其實位置無乜點大變動，仍然處於10線與保歷加頂線之間，用呢個位嚟玩Swing Trade的話其實可以嘅，反正Slow STC(14,3)兩線於中軸水平見回升向超買方向，但要預咗行得比較慢少少，事關喺五分鐘圖隱約見到指數有潛質喺高位行「長方形」。
恒指牛(53064)，收回價17,948點，同現價有約370點距離，今日新上市嘅所以無街貨，而槓桿有約35.92倍。按目前五分鐘圖見Slow STC(14,3)兩線上到超買位，安全嘅等等Slow STC(14,3)回落返去超賣先，進取嘅就借10/20線見支持就出動；如果用小時圖嘅話...都等等佢踩住10線有力先至出動，小心佢頭頂條100線/向下中的保歷加頂線。
最後...喺日線圖見到手好大個「身懷六甲」...但佢個位高不成低不就...Day Trade唔理佢咁多住啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，努力賺取我家肥貓罐罐。
作戰室免費試用，詳見專頁：https://bit.ly/3uixP4Y
