【now.com財經】上個星期五(8月25日)基本上都無掂到個市，一來見佢一開市就橫行已經被悶死，二來見好淡雙方打緊18,000點爭奪戰，所以都係飲住啖茶等收市。
本來都諗住指數會繼續吽落去，誰不知噚日收到個Message話大陸減半印花稅，好呀！香港依家都只係成立個唔知乜嘢小組去傾點樣「激活」市場咋；或者佢都係等睇點減印花稅然而大家Copy & paste去做啫。今朝港股已經比反應，開市爆升562點，報18,519點，熊證首四層街貨全數即被收回，呢度有相當於941張期指街貨。咁普天同慶嘅日子，恒大(03333)順便復牌開市報0.22元，依家9點57分報0.35元，較停牌前跌逾八成算係極道俾面，如果唔係今日有500幾點墊住？嘿走到貨都當你贏。
依家10點1分，指數依家升幅收窄至402點，報18,359點，高開低走中，所以作戰室都出咗淡倉。而依家喺五分鐘圖上見整條保歷加通道轉向上行，令指數同Slow STC(14,3)整體愈嚟愈有出Swing Trade條件。
「明明有利好消息但都只係高開低走嘅...」第一，個好消息唔係喺港股，係喺A股，除非你玩 「滬股通」同「深股通」先關你事；第二，減印花稅就等於啲基本因素如內房嘅問題就會解決啦咩？如果係得嘅話，更後知後覺都好，都唔會等到依家先嚟出掛。
恒指熊(52285)，收回價18,650點，同現價有約366點收回距離，槓桿約有43.53倍夠做DT，依家10點29分見恒指五分鐘圖高開低走過埋10線，Slow STC(14,3)兩線亦向住超賣方向出發，安全嘅用返Slow STC(14,3)上到超買位先至出動，進取嘅如果依家連五分鐘圖10線都可以做到阻力的話，就落場試試佢啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，努力賺取我家肥貓罐罐。
作戰室免費試用，詳見專頁：https://bit.ly/3uixP4Y
