【Now財經台】製作內地歌唱比賽節目《中國好聲音》嘅星空華文(06698)近日醜聞纏身。上星期網傳已故歌手李玟控訴節目唔公平嘅錄音後，爭議繼續發酵，但上市公司目前仲未出通告表態，公司股價亦喺2個交易日內由124元重挫逾40%，曾低見64.55元。
《香港股票財技密碼》作者梁杰文表示，星空華文估值被嚴重高估，現價顯著高於上市價26.5元，PE近300倍，唔鼓勵小股民冒高風險嘗試撈底。
Mike又指，呢類聲譽性損害可大可小，取決公司係咪能夠短期內平息事件，否則隨時火燒連環船，影響其他節目製作甚至贊助商。公司出事前就出咗盈警，而公司超過80%收入來自綜藝節目，單係《中國好聲音》近幾年佔公司收入約30%，Mike話對下半年收入預測會更保守。
