【now.com財經】噚日揀咗隻恒指熊(51656)出嚟，進取策略改一改以指數喺五分鐘圖再次唔過中軸就出動；安全策略不變，仍然五分鐘圖Slow STC(14,3)無可能一世都喺地板唔上天花板上到超買位時出動，當行一趟swing。
以噚日喺Patreon出【輪證下半Part】時間為1點16分計，如常on top比10分鐘作為睇文時間，即1點26分再次睇返個市，見恒指五分鐘圖上指數喺1點20分時剛剛上到中軸前再次唔過，換之言(51656)可以出場。同樣的以10分鐘作為買貨時間，以1點25分起計至1點35分，期內(51656)高低位做過0.056元/0.052元，平均買入價為0.054元。
正當戰友們研究緊個市喺1855X點硬過條命之時，指數忽然向下衝，本以為指數都會推得闊條保歷加通道口再比指數直落，但條命實在太硬啦，指數出咗爭兩點「平底」叫停後再比多支大大地嘅陽燭向上一炒，炒高過條10線，(51656)見指數反方向亦走及時離場。以1點35分見指數出「平底」再反身起計10分鐘作為離場時間，期內(51656)高低位做過0.057元/0.052元，平均走貨價為0.0545元。呢一注真係呢頭買頭沽，平均一格都無只係打個和輸手續費，咁點都好過好似前日指數咁無啦啦出注好倉都可以Hold到收市；呢啲唔聲唔聲先至最攞命。
係嘅，應該要相信指數目前仍然靠近牛證街貨，熊證大膽少少過夜的話，就唔駛好似噚日咁賠上手續費。今日指數繼續低開，再來一個裂口向下跌逾200點開市，開報18,356點，將首兩層牛證全數收回，呢兩層有相當於1,530張期指街貨。至依家10點3分，指數暫時最低見過18,333點，未算見到心目中嗰種一開市就瀑布式下瀉，但呢種裂口開市後再慢行先至擺命。
戰友提醒我，今日見不論係日線圖還是小時圖，圖上均見兩大裂口清楚顯示。如果，係短時間之內再出多個裂口向下的話，傳說中嘅Gap Theory(裂口理論)將會成立，因為市場到時會集齊咗三個花印：持續性裂口(Continuation Gaps)、突破性裂口(Breakaway Gaps)，同埋消耗性裂口(Exhaustion Gaps)。假如大市出現第三個裂口， 再之後仲有裂口出現的話，其實已經係屬於過度消費，雖然未必會即刻出現V型反彈，但跌定嘅機會就會愈嚟愈大。
不過，依家第三個裂口都未見，市場仍然向下望住18,000點嚟打，因為呢層除咗係儲上過千張期指街貨嘅重貨區之外，短期內仍見指數靠近牛證街貨同時，同熊證有成600幾點嘅距離。近牛遠熊嘅情況之下，真係唔好怪市場仍然看淡股市。
揀熊證要小心，近熊嘅街貨愈儲愈多，避開高街貨以免忽然人踩人的話，唯有犧牲少少槓桿。恒指熊(51823)，收回價19,076點，同現價有近690點差距，槓桿有約27.04倍，同市場上最高嘅約27.86偯真係有少少犧牲架，但(51823)今日新上市，所以未有街貨。
依家10點20分，五分鐘圖上見指數向下再次落到今朝低位水平附近，過線出當係進取策略玩法，安全嘅..Slow STC(14,3)上返超買位...er…或者中軸啦...
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，努力賺取我家肥貓罐罐。
作戰室免費試用，詳見專頁：https://bit.ly/3uixP4Y
