【Now財經台】361度(01361)中午出咗上半年業績，純利約7億人仔，按年增長逾27%，收入增長18%，毛利率升至41.7%，唔止符合盈喜，亦係2011年下半年以來最好嘅中期業績，不過，股價喺放榜後一度急瀉23%。
英皇資本財富管理方案研究總監陳錦興指，361度呢份業績係收貨，集團成本控制做得好，純利增幅大過收入，反映營運表現及執行能力達標。
內地7月社會消費品零售總額按年升幅收窄至2.5%，係7個月以來最差，反映消費復甦力度較差，Stanley就話，依家內地經濟環境較差，市民都唔敢隨便消費，會傾向發掘低檔次品牌。
此外，杭州亞運會將於9月23日至10月8日舉行，361度係官方合作夥伴，不過，Stanley認為，亞運會過後，361度增長有機會放緩，市場亦唔會有太大憧憬。
