【Now財經台】內地資產管理公司中植集團爆財務危機，旗下信託平台中融信託出現產品停止兌付，市傳涉及嘅規模可能逾3500億人仔。
據報，中融因投資房地產失利而「爆雷」，仲傳公司同出現流動性危機嘅融創中國(01918)、中國恒大(03333)、佳兆業集團(01638)等有合作，中融信託危機會唔會「燒埋」同內房有合作嘅內銀？
iFAST Global Markets副總裁溫鋼城認為，中央會力阻內房財務危機蔓延至內銀，加上按還債次序，一般會先還畀銀行，相信即使再有內房爆煲，銀行亦未至於要蝕晒。
Harris續指，依家內地唔再搞「大水漫灌」，好似2008年高調推出4萬億人仔救市計劃，估計當局會低調向銀行注資或喺金融市場加大投放，以免人仔面對更大貶值壓力，因為人仔貶值意味還債成本增加，對內房嚟講係雪上加霜。
