【now.com財經】唔呃你，噚日下半場喺作戰室的確手痕，出咗注好倉等到臨完場前先至走人，其實唔會咬到好大啖，一來指數喺下半場回返上去時回得比較慢，二來手痕注即時啫，都唔會揀隻好貼&高槓桿嘅牛證落場，識死嘅，所以呢注都只係慢火炆牛，完場前熄火收工。
又咁講，被恒指咁樣將跌幅縮窄到得返300零點，喺日線圖上佢都算係向下破位出咗「錘頭」，下影線踩住保歷加底線，仲要係低開高走嘅空心陰燭，本以為今日指數會可以做返好少少。但結果今日開出嚟都係跌174點，開報18,599點，以1點姿態踩入牛證第一層街貨18,500至18,599點。
睇開牛熊街貨圖就睇埋落去啦，熊證今日見有多一層新貼熊上市，最貼見19,100至19,199點，而牛證最貼價退至18,500至18,599點，而重貨區退到落去18,000至18,099點，合理，呢啲齊點數關口位通常都係Set做支持位，中間間開少少見18,300至18,399點為最多新增街貨層，是但啦，反正下方牛證層層都有500至700幾點，如果指數再跳水的話，求其跳兩三層又過千張期指袋袋平安。
10點未到作戰室戰友Post出最新消息：「人行出招：人民銀行下調中期借貸便利操作(MLF)利率及逆回購操作利率，分別下調15點子及10點子。」果然大到不能倒，而呢一下的確有刺激港股，將本來跌緊170幾點嘅恒指一下子抽高至一度跌幅收窄至30幾點，嚟到依家9點58分，恒指跌幅再見擴大至跌90點，報18,682點。
市弱無計，喺五分鐘圖上見指數於中軸上出咗「擊射之星」嘅物體，呢個位暫時(截至10點5分止)已經係今日高位，高位見「擊射之星」仲唔係出淡倉嘅時間？恒指熊(51656)，今日新上市熊證，所以未見有街貨，收回價見19,088點，如今佢唔死的話，聽日就會見19,000至19,099點新貼熊街貨層，以收回價同現價計，有大近400點嘅距離，佢唔係市場上最貼嘅熊證，不過槓桿有約42.48倍都已經夠做DT，五分鐘圖「圓頂」生成兼依家10點8分指數跌幅擴大至創日內新低，唔睇圖都估到應該過「圓頂」頸線，衝入去唔反對，留意嘅係保歷加通道口要保持拓闊，咁Slow STC(14,3)先至可以有條件出超賣再超賣，否則如常的等Slow STC(14,3)玩Swing一趟都可以。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，努力賺取我家肥貓罐罐。
作戰室免費試用，詳見專頁：https://bit.ly/3uixP4Y
