【Now財經台】創仔股曼妠(08186)最少改過兩次名，亦玩過合股、供股呢啲財技，喺前身「同仁資源」時代更被獨立股評人David Webb「點名」，列為50隻不宜沾手港股之一。
公司最近又「伸手」，上周五(11日)提出按「1供3」基準，發行逾8500萬股新股，供股價0.22元，較當日收市價折讓逾26%，重點係公司依家發行股數僅約2800萬股，供股後大增近3倍至逾1億股。
雖然供股比例咁大，但集資淨額最多僅1750萬元，《香港股票財技密碼》作者梁杰文認為，雖然銀碼唔夠冚逾2100萬元嘅總負債，加上供股計劃按非包銷基準去做，需要所有股東參與認購先籌到最大筆資金，但短期仍有助公司補償負債缺口。
Mike續指，曼妠啱啱完成債務重組，主要股東以股代債方式接受咗一大批股份，換算返每股成本約0.55元，高過現價唔少，唔排除主要股東可能想攤薄成本，或者睇好公司前景而參與供股。
