【now.com財經】噚日下半場開市無耐，喺恒指五分鐘圖上見Slow STC(14,3)兩線落到超賣水平，順利食咗隻淡倉，平均賺幅19.7%亦袋袋平安。不過，隨後大市愈跌愈有，仲創日內新低，喺2點鬆啲見指數落到低位19,112點，睇返噚日揀嘅恒指熊(50903)證價最高見過0.051元，的確如果捉得到嗰一個位先嚟走嘅話，賺幅唔止咁少；但袋咗落袋先係錢，力保正數已經唔係易事。
而如果持貨到今朝嘅話，隻(50903)應該仲爽，事關今朝恒指再向下落多124點，開報19,059點，五分鐘圖上見保歷加通道拓闊，而Slow STC(14,3)兩線勢頭亦見向下，作戰室都準備定出淡倉接跌，不過，到開市之後見指數浮浮沉沉、模稜兩可咁，所以大家第一個動作都選擇等。
到依家9點49分，指數見低開高走，暫時跌幅收窄至18點，報19,165點，確係有啲奇，難得指數開市口將第一層牛證19,100至19,199點全數收回之後，隻腳都踩咗入重貨區19,000至19,099點，呢度有過千張期指街貨，暫時低位19,052點計，可以當佢食咗半層重貨區嘅，拆開呢層睇返19,050至19,099點呢度有相當於522張期指，夾埋19,100至19,199點嗰323張期指的話，夾埋都只係得845張期指，真係夠？
嚟到依家10點6分，指數變化仍然唔大，開始擔心喺五分鐘圖會出現「三角形」又似「長方形」走勢。轉個小時圖出嚟就見到今日首半小時喺小時圖行出「倒轉錘頭」...但好似都唔見佢發揮到功效...市弱確實無計。
順街貨方向的話，淡倉出動亦是合理，只不過係今日似乎比較難搵位入。執定隻恒指熊(51157)，收回價19,448點，同現價有近360點差距，如果小時圖嘅「倒轉錘頭」咁叻推得郁指數的話，過到10線先再講。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，努力賺取我家肥貓罐罐。
作戰室免費試用，詳見專頁：https://bit.ly/3uixP4Y
