【Now財經台】聯儲局官員威廉斯噚晚「放鴿」，指若明年通脹放緩，可能有需要減息，今日息口敏感嘅資源股逆市跑出，其中，中國宏橋(01378)最多升近6%，高見7.83元，收市仍升逾3%，係表現最佳藍籌。
呢隻鋁產品股7月底發盈警，預告中期少賺70%，主要是產品價格下跌，以及原材料價格上漲，令收入減少、毛利率受壓，但點解宏橋盈警後，股價不跌反升，至今已累升逾10%？
英皇資本財富管理方案研究總監陳錦興分析指，去年上半年產品價格高企，對比下今年同期純利大跌係幾合理，而相比去年下半年，上半年盈利增幅唔算小，所以公司基本面並冇大問題，加上市場憧憬內地嘅經濟刺激政策會喺第3季尾開始見效，相信股價後市仍有支持。
Stanley續指，現時宏橋股價續處於上升軌道，估計短期內或突破8元，到時要留意高位回套壓力大唔大。
