【Now財經台】恒指季檢將會喺下星期五(18日)出爐，中金之前出咗報告，估計快手(01024)、理想汽車(02015)及太古地產(01927)等有機會「染藍」，快手之前多次大熱倒灶，理想汽車就係3大造車新勢力中，唯一有錢賺，呢兩隻股份今次跑出成為「藍籌新貴」嘅機會大唔大？
華盛證券經紀部董事李偉傑指，市場對快手今次可以「染藍」嘅期望係大咗，除咗睇流動性及市值等因素之餘，亦要睇盈利表現，快手上半年發咗盈喜，會唔會追到今次「染藍」嘅時間，因為集團月底先出業績，所以恒指公司會唔會只因為呢個盈喜就納入快手，呢方面係有機會再一次令市場失望。
至於理想汽車，Jason就認為，被納入嘅機會高過快手，集團第2季銷售持續上升，中期業績好大機會扭虧為盈，但值得留意係，集團冇發過盈喜，會唔會期內撥備多咗，呢方面可能係一個隱憂。
