【Now財經台】截至早上11時止，1小時內《彭博》用戶關注度上升最多港股，依次為中芯國際(00981)、阿里巴巴(09988)、騰訊控股(00700)、龍湖集團(00960)及長和(00001)。
長和噚日出咗業績，上半年按年少賺41%，中期息按年減少10%。績後股價明顯受壓，今朝曾跌近5%，低見44.05元，暫時係表現最差藍籌。
大華繼顯執行董事梁偉源認為，市場對派息減少嘅消息過分敏感，導致股價跌過龍，並指撇除舊年嘅一次性收益淨額後，集團純利只係跌13%，其實中期息減少10%唔算差。
Steven預期，隨著長和上半年面對嘅問題逐步改善，包括英鎊及人仔貶值帶來嘅匯兌損失，以及港口業務增長放慢，集團下半年業績將會好轉。此外，集團預告下半年將恢復回購股份，佢估計，長和或會利用意大利電訊業務重組後所得嘅現金做回購，亦係股價催化劑。
