【Now財經台】創科實業(00669)股價8月至今升約10%，今日收市升4%，報96.95元，係今日及8月表現最佳藍籌。
花旗估計，創科嘅大客家得寶(Home Depot)第2季業績會有改善，又話最近美國新屋動工量超預期，都係行業利好訊號，創科下周三(9日)就出中期業績，係咪值得憧憬？
艾德金融聯席董事陳政深預期，創科上半年業績按年將顯著復甦，但未必畀到市場驚喜，又話關注公司銷售量及毛利率會唔會跌。佢指出，美國新屋銷售正穩定增長，但仲未回復至2020年中水平，行業仍去緊庫存，或會影響創科近年平均逾35%嘅毛利率。
Ryan又提醒，創科旗下電動工具品牌Milwaukee被美國國會質詢其供應鏈使用中國監獄勞工，呢類指控嘅發酵空間好大，必須注意風險。佢續指，創科急升後資金或會借勢喺高位回套，到時可能回調至90元樓下。
