【Now財經台】截至早上11時止，1小時內《彭博》用戶關注度上升最多港股，依次為碧桂園(02007)、阿里巴巴(09988)、雅居樂集團(03383)、騰訊控股(00700)及京東集團(09618)。
碧桂園、雅居樂都有配股消息，市傳碧桂園原本打算配股籌逾23億元，並已獲足額認購，但今日凌晨突然取消配股計劃，股價今朝一度跌逾10%至1.41元。
盈寶證券投資顧問總監譚智樂估計，可能最終認為唔需要靠配股集資，所以撤回計劃，但市場依家一聽到內房配股，就會特別關注公司嘅流動性。
Arnold表示，雖然碧桂園作為大型內房民企代表，仲有好多投資者相信公司只係畀成個行業拖累，但事實係公司債最近被大舉拋售，相信消息會令市場正視公司債務問題。佢又話，碧桂園技術上冇轉勢訊號，隨著更多消息曝光，估計股價將會大上大落。
至於發咗盈警嘅雅居樂則成功配股集資，但淨額僅3.8億元，Arnold認為，認為集團未必係想撲水，而係想透過配售成功嘅消息挽回市場信心，偏偏弄巧反拙，被市場解讀成集團嘅流動性緊絀到連3億元都要靠配售籌返嚟，拖累股價急瀉。
