【Now財經台】港股近日回勇，交投亦明顯有改善，噚日成交係半年以來最多。繼發改委日前指，要適時優化內房政策後，最新國務院常務會議又話要調整及優化房地產政策，但內房股仍然受壓，雅居樂集團(03383)喺呢個時候宣布折讓配股集資，但金額唔算多，只係籌約3.8億元，消息一出又震散股價。
高富金融集團投資總監梁偉民指，由於內房融資渠道中斷，不論銀行貸款、發債、資金回籠都出現問題，導致內地民眾對買樓有戒心，亦令民企內房財困情況冇改善，甚至有惡化趨勢。另一方面，雅居樂、碧桂園(02007)股價大幅下滑，3年間已累跌80%以上，公司發行嘅債券價格亦大插水，都反映市場對民企內房已失去信心。
Wyman又話，如果要扭轉呢個情況，要中央出手紓緩融資渠道。就算雅居樂今次成功集資，金額都好細，相對於集團嘅債務或潛在資金需要只係杯水車薪，所以最終都係要靠中央出手。
