【Now財經台】日本城母公司國際家居零售(01373)噚日出咗全年業績，純利倒退18%，股價今朝裂口低開6%後，一度跌逾10%，見咗暫時低位2.65元，其後跌幅略為收窄，中午收市報2.7元，跌8.7%。
集團2013年上市後，收入年年有增長，今次係上市以來，收入首度大幅倒退，雖然業績一開始就話年內收入係歷來第2高，但受高基數影響，全年收入、純利雙雙倒退，加上佔收入比重高達80%嘅香港市場，業務增速由上個財年9.3%急降至4.5%，都解釋到股價點解今日裂口急挫。
國際家居零售股價5月曾創3元嘅上市新高，但繼去年10月後，今日再度失守250牛熊線，業績似乎延續唔到增長故事，股價今年亦正式由升轉跌。
