【Now財經台】主要從事智能玩具生產及銷售嘅奇士達(06918)擬配股集資，但股價今日狂飆，今朝高開14%，但已經係暫時低位，其後股價不斷攀升，一度抽高74%，成交股數亦急增，較過去100日同時段平均增加16倍。
奇士達噚晚出通告，指計劃以每股0.35元，較噚日收市價僅折讓約1%，配售1.04億股新股，相當於擴大後股本近17%，集資約3600萬元，用作還債及一般營運資金。
奇士達上市以來，雖然收入及純利呈下跌趨勢，加上內地玩具車市場競爭激烈，市場分額跌至不足1%，但去年7月起股價離奇地於逾1個月內，累升1.8倍，去年8月升上4.6元嘅上市新高，8月底公布上半年業績由盈轉虧，股價喺放榜後第2個交易日閃崩，收市急瀉72%，之後股價一沉不起，於0.5元至1元橫行。
奇士達今年3月仍未能如期出業績，直至7月才復牌，噚日收市後宣布配股集資，係上市以來首次，後市要留意公司會唔會有更多動作。
