【Now財經台】中國國航(00753)股價今朝輕微高開後，保持升勢，但早市明顯唔及其他板塊興奮，午後發力追落後，一度升5.6%，高見6.36元，升上約兩個月高位，但之後升幅收窄。
內地去年12月開關後，內地航班數量已超越疫前水平，不過，國際客運航班仲未全面復常，噚日政治局會議提及「要增加國際航班、保障中歐班列穩定暢通」，經營較多國際航線嘅國航，股價暫時已連升第3日，並升穿上升通道，14天RSI進一步上升，不過，中央要求增加國際航班暫時似乎仲係一個口號，未有具體內容，加上早前中國民航局預告，年底國際客運航班量僅回復至疫前最多65%，要全面復常似乎短期內好難實現。
