【Now財經台】港股業績期就快殺到，其中，渣打集團(02888)周五(28日)會派季度成績表，滙豐控股(00005)就會喺8月初放榜，市場對今個業績期有冇憧憬？市場預期美國加息周期好快結束，本港銀行加息空間有幾大？
招銀國際股票部執行董事蘇沛豐指，內地經濟自4月開始，表現一直令人失望，因此，對喺香港上市嘅中資股業績冇期望，不過，估計國際銀行股第2季業績表現會較強。
Daniel又預期，銀行股短期會以區間上落為主，因為美國加息周期就快完結，利率上升空間唔多，反而擔心內地經濟情況會導致銀行壞帳風險增加，其中，東亞銀行(00023)由於內地貸款同業務佔比較大，有機會畀壞帳風險會拖低估值。
